Ikerketa Ekintza Parte-hartzaileari buruzko Jardunaldiak

Webgune honetan aurkituko duzu Euskadiko eta Kolonbiako hiru unibertsitatetan (Euskal Herriko Unibertsitatean (UPV/EHU), Universidad Surcolombiana-n (USCO) eta Universidad del Cauca-n (UNICAUCA)) egingo ditugun Ikerketa Ekintza Parte-hartzaileari buruzko Jardunaldien inguruko informazio guztia. 2024 eta 2025ean zehar ospatuko ditugu hiru jardunaldiak, bat unibertsitate bakoitzeko, non lurralde bakoitzean parte hartzen duten subjektu desberdinen ekarpenak ehunduz joango gara IEP-aren inguruko hausnarketan sakontzeko asmoz.

Jardunaldiak UPV/EHUn

2024, azaroak 28 eta 29

IKUSI EGITARAUA

Jardunaldiak USCOn

2025 (data zehaztu gabe)

IKUSI EGITARAUA

Jardunaldiak UNICAUCAn

2025 (data zehaztu gabe)

IKUSI EGITARAUA

Gure helburuak asmo handikoak dira:

Parte hartuz eraikitako pentsamendu eta ekintza eraldatzailearen zentzuaren inguruan sakontzeko espazioak sortzea unibertsitateetan. Baita Ikerketa Ekintza Parte-hartzailearen (IEP) planteamendu etikoa eta epistemikoa ulertzeko ere.
Diskurtso kritikoak ezagutzea eta ezagutaraztea, hala nola: Hegoaldetik proposatutako epistemologiak, epistemologia feministak, ikuspegi dekoloniala, ekosoziala, arrazakeriaren aurkakoa, etab. Eta horiek IEP prozesuekin duten lotura aztertzea.
Ipar eta Hego globaletik bultzatutako esperientziak aurkeztea, lurralde bakoitzean sortutako teoria eta prozesu sozialen arteko loturak erakusten dituztenak.
Mendebaldeko akademian nagusi diren logikak gainditzea eta ezagutza kritikoa eraikitzeko beste jakintza, esperientzia, lurralde eta subjektu batzuk aitortzea.
Gizarte-eraldaketarako hezkuntzaren esparruan subjektu desberdinen arteko aliantzak ehuntzen jarraitzea (unibertsitate-komunitate desberdinetako eragileen eta gizarte-eragileen artean).

Zer eskaintzen dute Jardunaldi hauek?

Unibertsitate bakoitzak bere errealitatera eta interesetara egokitutako egitarau bat eskainiko du. Hala ere, Jardunaldi guztietan hitzaldiak, elkarrizketak eta tailerrak izango ditugu, IEPren jatorria eta ibilbidea ezagutzeko, IEPek kultura-aldaketa bultzatzeko duen ahalmena aztertzeko, ikerketa-ekintzako prozesuetan esku hartzen duten subjektuak eta haien parte-hartze aktiboa ziurtatzearen garrantziari buruz sakontzeko…

Besteak beste, Ikerketa Ekintza Parte-hartzaileari buruzko Jardunaldietan honako gai hauek jorratuko ditugu:

Teoria eta ekintza kritikoa ezinbesteko aldaketa kulturalerako estrategia gisa

Mendebaldeko akademiaren ezagutza hegemonikoa kritikoki aztertzen saiatuko gara, baita jakintzaren deskolonizazio-prozesu bat gauzatzearen garrantzia ere. Gogoeta egin nahi dugu jakintzaren monopolioa hausteak dakartzan ondorioei buruz, elkarrizketaren bidez sortzen den jakintza alternatiba gisa kokatuz. Beti ere, “bestea” aintzatzat hartuz, berdintasuna oinarri izanik baina desberdintasunak errespetatuz. Horiek guztiek parte-hartzearekin (IEPren funtsezko dimentsioa den horrekin) oso lotuta dauden gaiak baitira.

IEPren jatorria eta ibilbidea

IEParen zentzua ulertzen saiatuko gara, hau da, “zertarako” balio duen. IEPren bokazio politikoa aztertuko dugu; gizartea eraldatzeko herri-erakunde eta -borrokekin duen konpromisoa. Gainera, teoria eta praktika erlazionatzen saiatuko gara, kontuan hartuta IEP estuki lotuta dauden bi esparrutan garatzen dela; alde batetik, tokian tokiko garapenarekin (ekintzarekin), eta, bestetik, teorizazioa eta kontzeptualizazioarekin (ikerketa-hausnarketarekin).

IEP prozesuak eraikitzeko subjektuak

Gogoeta egin nahi dugu ea komunitatearekin eta komunitatearentzat ikertzen dugun, zer inplikatzen duen ikerketan parte hartzen duten subjektuen parte-hartze aktiboak, zer harreman mota eraikitzen dugun lan egiten dugun subjektuekin… “Ikertzailearen” eta “ikertuaren” arteko hausturak zer dakarren aztertuko dugu, “subjektu/objektu” harreman tradizionala eta asimetrikoa eraldatzeko asmoz. Gainera, parte-hartze prozesuek emantzipazioa eta subjetu kritikoen eraikuntza nola sustatzen duten aztertuko dugu, baita prozesu horiek komunitatea eta gizartea nola indartzen duten ere.

IEP prozesuen eraikuntza

IEP prozesuak eraikitzeko funtsezko gai batzuk jorratuko ditugu, besteak beste: talde-lana, prozesu sozial emantzipatzaileekin landutako artikulazioa (horrekin batera, lurraldearen, errealitatearen eta prozesu sozial emantzipatzaileen garrantzia), sentipentsamendua (arrazionalismo dualista eta dikotomiko modernoaren aurkako proposamen gisa), begirada kritikoak aplikatzea (dekoloniala, arrazakeriaren aurkakoa, feminista, ekosoziala), diziplinartekotasunaren garrantzia arazoen konplexutasuna ulertzeko eta erantzun eraginkorrak sortzeko…